Íslensk listasaga - tilboð

Gallerí Fold býður félögum í Safnaranum og öllum þeim viðskiptavinum sem eru á póstlista gallerísins Íslenska listasögu á sérstöku tilboði.

Verð 49.990 kr.
Tilboðsverð 39.990 kr.

Panta núna

Segja má að brotið sé blað í menningarsögu Íslands með útgáfu yfirlitsverks um íslenska myndlist. Íslensk listasaga er fimm binda verk sem spannar tímabilið frá síðari hluta 19. aldar til upphafs 21. aldar. Bindin eru gefin út samtímis í vandaðri öskju og er verkið allt um 1400 blaðsíður.

Forlagið gefur verkið út í samvinnu við Listasafn Íslands og er markmiðið með útgáfunni ekki aðeins að gera grein fyrir sögu íslenskrar myndlistar heldur einnig að styrkja og móta hugmyndir okkar um myndlist þjóðarinnar, sameiginlega arfleifð hennar og sjálfsmynd. Í tilefni útgáfunnar opnar í dag yfirlitssýningin ÞÁ OG NÚ í Listasafni Íslands þar sem saga íslenskrar myndlistar er rakin, einnig verður boðið upp á metnaðarfulla fræðsludagskrá í safninu á meðan sýningu stendur.

Verkefnið hefur átt sér langan aðdraganda en í ársbyrjun 2007 var Ólafur Kvaran ráðinn ritstjóri þess, ritstjórn skipuð og samningar gerðir við fjórtán höfunda. Við ritun verksins er lögð sérstök áhersla á einkenni íslenskrar myndlistar á hverju tímaskeiði, sögulegt samhengi hennar og samband við alþjóðlega listasögu. Í umfjöllun og túlkun höfundanna er þannig leitað svara við ýmsum sameiginlegum spurningum en jafnframt eru áherslur þeirrar ólíkar því viðfangsefnin eru um margt ólík.

Í verkinu eru litljósmyndir af á annað þúsund listaverkum, sem varðveitt eru á söfnum hérlendis sem erlendis eða eru í einkaeigu, og yfirgripsmikill fróðleikur sem nú verður aðgengilegur almenningi á einum stað. Útgáfa Íslenskrar listasögu er því mikið menningarlegt framlag sem vert er að gefa gaum á erfiðum tímum í íslensku þjóðlífi.

Íslensk listasaga var prentuð í prentsmiðjunni Odda en sennilega er það einsdæmi að jafn umfangsmikið verk komi út í einu lagi hér á landi.

„Stórglæsilegt verk sem er í senn fræðandi og áhugavekjandi og mun nýtast jafnt leikum sem lærðum. Hér hefur verið lyft grettistaki til að færa íslenska myndlist til þjóðarinnar.“

Katrín Jakobsdóttir, mennta- og menningarmálaráðherra


„Íslensk listasaga I-V er stórvirki. Íslendingar hafa eignast tímamótaverk.

Guðmundur Oddur Magnússon, prófessor við Listaháskóla Íslands


„Listasagan er löngu tímabært yfirlit um íslenska myndlist og varpar ljósi á þátt myndlistar í sögu þjóðarinnar.“

Kristján Steingrímur, deildarforseti myndlistardeildar Listaháskóla Íslands